Mio.alliinfz

Türkiyədə həkim qardaşlar koronavirusdan öldü

Türkiyənin İzmir şəhərində 18 gün ərzində iki həkim qardaş koronavirusun qurbanı olub.

“Report” NTV-yə istinadən xəbər verir ki, əvvəlcə aprelin 1-də böyük qardaş Muharrem İdiz dünyasını dəyişib.

Yüksək hərarət və nəfəs çatışmazlığı ilə ötən həftə xəstəxanaya yerləşdirilən kiçik qardaş Nuri İdiz də həkim olub və onun da koronavirus testi pozitiv çıxıb.

Aprelin 6-sı reanimasiyaya yerləşdirilməsinə baxmayaraq, onun həyatını xilas etmək mümkün olmayıb. N.İdiz bu gün keçinib.

Qeyd edək ki, rəsmi məlumata görə, Türkiyədə koronavirusa yoluxanların sayı İran və Çini ötərək 86 306 nəfərə çatıb. Onlardan 11 976 nəfəri sağalsa da, 2 017 nəfər virusun qurbanı olub.

Xatırladaq ki, koronavirus infeksiyası ötən ilin dekabrında Çinin Uhan şəhərində yayılmağa başlayıb. Hazırda virus 210 ölkə və bölgədə qeydə alınıb.

Dünyada koronavirus infeksiyasına indiyədək yoluxanların sayı 2 424 000-i ötüb. Bunların 636 187 nəfəri sağalıb, 166 053 nəfəri isə ölüb.

Ümumdünya Səhiyyə Təşkilatı (ÜST) fevralın 11-də infeksiyanın adını COVID-19 qoyub, martın 11-də isə koronavirusu pandemiya elan edib.