Azərbaycanda artıq pandemiya məhbusları da var. Ən dəhşətlisi odur ki, pandemiyanın ucbatından məhkum edilən şəxs iş adamıdır, nümunəvi ixracatçılardandır, hər zaman nizam-intizamlı fəaliyyətinə görə fərqlənib. Yəni indiyə qədər onun işində elə bir nöqsan olmayıb ki, dövlət qurumları ilə əməkdaşlığında problem yaşansın. Lakin epidemiya səbəbindən 2 ildən çoxdur ki, ölkə və dünya iqtisadiyyatının kəllə-mayallaq olması istər-istəməz sahibkarların qarşısında ağır problemlər qoyub. Anaxeber.info bildirir ki, kənd təsərrüfatı ixracatçısı olan Təyyar Hidayətov həmin pandemiya məhbusudur və düşdüyü çətinliklə bağlı dəstək verilməsinə əvəzinə həbsə göndərilib. T.Hidayətov ölkədən kənd təsərrüfatı ixracının təşkilini aparan öndə gedən sahibkarlardan biridir, təəssüf ki, indi onu azadlıqdan və işindən məhrum ediblər. Bu pisliyi edən isə Bərdə rayon məhkəməsinin hakimi Qamət Əbilovdur. O, bu il dekabrın 7-də araşdırma aparmadan iş adamı barəsində inzibati həbs qərarı verib. Hakimin əsassız qərarı ilə bağlı Prezident İlham Əliyevə, Ədliyyə naziri Fikrət Məmmədova müraciət edən sahibkarın yaxınları Q.Əbilovun hökmünü ədalətsiz sayırlar. Bildirilir ki, ölkədən ixrac edilən kənd təsərrüfat məhsulunun pul vəsaitini müvəkkil bank vasitəsilə geri qaytarmadığı təqdirdə qərar çıxarıla bilər. İş adamı T.Hidayətov təkcə 2020-ci ildə ölkəyə 2 milyon dollar pul vəsaiti qaytarıb. Lakin həmin il vergi bank hesabına qoyulan sərəncam, pandemiya dövrü olduğundan bəzi pul vəsaitinin xarici ölkədə qaldığından geri qaytarılmayıb. Hakim Qamət Əbilov göstərilən bu səbəbləri nəzərə almadan ona həbs verib. Belə bəhanə edib ki, gömrük ondan tələb edir, başqa addım atmaq mümkün deyil. Bu isə hüquq-məhkəmə sisteminə yaraşmayan davranışdır. Çünki pul vəsaitini əgər bir sahibkar olaraq öz hesabına qaytarmayıb, başqa ölkəyə pul vəsaiti kimi çıxartsa, o halda həmin qərar iş adamına şamil oluna bilər. Görünən odur ki, T.Hidayətovun ixrac etdiyi məhsulun alıcısı olan qarşı tərəf pul vəsaitini bank hesabına 180 gün müddətə qaytarmalıdır. Bu müddət keçəndən sonra pulun geri qaytarılması qeyri-mümkündür. 11 saylı Vergi İdarəsinin bank hesabına sərəncam qoyduğu müddət 1 ildən artıqdır. Yəni burada sahibkar ixtiyarı xaricində olan bir neçə səbəblərdən pul vəsaiti geri qaytarılmayıb. Amma hakim problemləri nəzərə almadan inzibati həbs çıxarıb. Müraciətdə dövlə başçısından dəsətk istənilir: “Cənab Prezident, bu gün ölkədə kənd təsərrüfatı ixracına göstərdiyiniz diqqət, bütün sahibkarlar tərəfindən qiymətləndirilir. Lakin Əbilov Qamət kimi hakimlərin çıxardığı qərarlar Sizin dəstəklədiyiniz məhkəmə-hüquq sisteminə ləkə gətirir. Əbilov Qamət vicdanla, ədalətə istinad edərək qərar çıxartmaq əvəzinə Hidayətov Təyyarın üç azyaşlı övladı olmasını, digər göstərilən səbəbləri nəzərə almadan verdiyi həbs qərarı haqsızlıqdır. Hörmətli Prezident, Sizə güvənərək Hidayətov Təyyara verilən bu haqsız qərara görə Ədliyyə Nazirinə , Ali məhkəmənin sədrinə Əbilov Qamət barəsində tədbir görülməsi üçün tapşırıq verməyinizi xahiş edirik”.
Anaxeber.info
