Davam edən COVID-19 pandemiyası həyatımızda bir çox dəyişikliklər etdi. Quru sərhədlər bağlıdır, beynəlxalq dəmir yolu və avtobus xidmətləri işləmir. Digər ölkələrdən Azərbaycana yalnız hava yolu ilə, müəyyən qaydalara riayət etməklə, epidemioloji vəziyyət nəzərə alınmaqla gələ bilərsiniz.
Ancaq təyyarə biletlərinin qiymətlərinin həddindən artıq yüksək olması səbəbindən hər kəs bunu edə bilmir. Bu vəziyyət müxtəlif ölkələrdə, xüsusən də Rusiyada yaşayan soydaşlarımızı məyus edir.
Bununla əlaqədar bu yaxınlarda Rusiya Azərbaycanlıları Regionlararası Assosiasiyası (RARA) Azərbaycan Respublikasının Prezidenti İlham Əliyevə müraciət etdi. Müraciətin mətnində qeyd olunur ki, Rusiyada yaşayan azərbaycanlılar tarixi vətənləri ilə güclü mənəvi və ailə bağları ilə bağlıdır.
“Hazırda Azərbaycana yalnız hava yolu ilə getmək mümkündür Koronavirus infeksiyasına görə quru yolla nəqliyyat müvəqqəti olaraq dayandırılıb. AZAL-ın uçuşlar üçün təyin etdiyi yüksək qiymətləri ödəmək üçün bir çox həmvətənlərin maddi imkanları yoxdur. Biletlərin qiyməti bölgənin qonşu ölkələrində oxşar uçuşlardan üç dəfə yüksəkdir. Bu problem həmvətənlərimiz arasında ədalətli narazılığa səbəb olur”, - deyə RARA bildirir.
“Assasiasiyanın Məşvərət Şurasına həmvətənlərimizdən AZAL-ın uçuş qiymətlərinin endirilməsi məsələsini qaldırmaq üçün çoxsaylı müraciətlər gəlməkdə davam edir. Soydaşlarımızın böyük hissəsi iqtisadiyyatın indiki şəraitdə müəyyən çətinliklər yaşayan aşağı maaşlı sahələrində çalışır. Eyni zamanda, qohumlarımıza, hər birimizə, Azərbaycana biganə qala bilmərik”, - deyə müraciətdə vurğulanır.
Bu problemi həll etmək üçün RARA Azərbaycan Prezidentindən AZAL-ın Rusiyanın paytaxtı və bölgələrinə uçuşları üçün mövcud qiymətlərin əsaslılığını yoxlamaq üçün aidiyyəti dövlət orqanlarına tapşırıq verməsini xahiş edir: “Əminik ki, bu məsələyə diqqətiniz problemi müsbət həll etməyə imkan verəcək”.
Vəziyyəti aydınlaşdırmaq üçün AYNA redaksiyasından AZAL-ın mətbuat xidmətinə sorğu göndərdik. Lakin bir həftə ərzində sorğumuza heç bir cavab ala bilmədik.
AZAL dövlət büdcəsindən subsidiya alsa belə, belə bir qiymət siyasətinin şirkətin ayaqda qalması üçün mövcud olduğunu iddia edirsə, qiymətləri ondan çox ucuz olan başqa ölkələrin hava yolları necə yaşaya bilir?
Belə bir şəraitdə AZAL qiymət siyasətinə yenidən baxmaq istəmirsə, o zaman biletləri alternativ qiymətlərlə Azərbaycana təqdim edən başqa aviaşirkətlərin ölkəyə dəvət edilməsinə ehtiyac var ki, rəqabət mühiti yaransın. Bu, həm Prezidentə üz tutan soydaşlarımızın problemini həll edəcək, həm də avtomatik olaraq ölkəyə turist axınını artıracaq.
Qeyd edək ki, bu məsələ azərbaycanlı deputatlar tərəfindən dəfələrlə qaldırılsa da, hələ də öz həllini tapmayıb.
