Zaqatalada şəhidin adını daşıyan məktəb görün nə vəziyyətdədir.
Rayonun ucqar Kəpənəkçi kənd orta məktəbi yararsız vəziyyətə düşsə də, qışın bu sərt günlərində dərslər davam edir.
Bizim.Media-nın yerli bürosu xəbər verir ki, şəhid Sərdar Kərimov adına Kəpənəkçi kənd tam orta məktəbi ötən əsrin 60-cı illərində inşa olunub və 8 illik məktəb kimi fəaliyyət göstərib. Ötən illərdə heç bir təmirə dayandırılmayan bu binanın hazırda ciddi görüm-baxıma ehtiyacı var.
Məktəbdə şagirdlər sınıq pəncərələri olan siniflərdə dərs keçirlər ki, bu da istiliyin nə dərəcədə olmasının başlıca göstəricisidir. Küləkli bəzən də temperaturun aşağı düşdüyü günlərdə uşaqlar üst paltarlarını nəinki çıxarır hətta balacalar əlcəkdən belə istifadə etmək məcburiyyətində qalır. Təhsil ocağının pəncərələri ilə yanaşı döşəməsi, tavan və qapıları də yararsız haldadır. Valideynlərin sözlərinə görə uşaqlar dəfələrlə döşəmədə sicanlar görüb. İlin yaz-yay aylarında isə siniflərdə ilanlara da rast gəlinib.
Yeri gəlmişkən, min nəfərdən çox əhalisi olan Kəpənəkçi kənd məktəbində 170 şagird təhsil alır. Şagirdlərin təlim-tərbiyəsi ilə 30-a yaxın müəllim məşğul olur.
Məsələ ilə bağlı Şəki-Zaqatala Regional Təhsil İdarəsindən Bizim.Media-ya bildirilib ki, qarşıdakı tədris ilində region üzrə 2 məktəbin yenidən inşası və 100-dən artıq məktəbin isə əsaslı təmiri nəzərdə tutulur.
Kəpənəkçi kənd tam orta məktəbinin hazırkı vəziyyətinə gəldikdə isə regional idarədən bildirilib ki, bu təhsil ocağının maddi-texniki bazasının möhkəmləndirilməsi məqsədi ilə aidiyyəti üzrə müraciət edilib.
Müraciətin nə vaxt, nə zaman icrası isə hələ sual altındadır. Çünki təhsil müəssisələrinin təmiri və tikintisi növbəlilik əsasında həyata keçirilir.
Bu baxımdan Kəpənəkçi məktəbinin də təmir növbəsinin nə zaman çatacağını ancaq tikinti briqadaları orada peyda olanda bilinəcək. O zamana qədər isə 170 şagird və 30 müəllim üst-başlarını qalın etmək, gəmiricilərdən, ilanlardan qorunmaq məcburiyyətindədirlər.
