Bu dəfə sizə tanıdacağımız şəhid, Vətən müharibəsində canından keçən Eşqin Mehdilidir. Eşqin Mehdili, Füzuli şəhərinin işğaldan azad olunması uğrunda əbədiyyətə qovuşan qəhrəmanlarımızdan biridir. Ailəsi onun yaşadığı evin bir otağını ayrıb və onun üçün ev muzeyi edib.
Mehdili Eşqin Tərlan oğlu, 2001-ci ilin oktyabrın 10-da Beyləqan rayonunun Baş Əlinəzərli kəndində anadan olub. Oktyabr ayında dünyaya gələn Eşqin, 2019-ci ilin oktyabrında hərbi xidmətə yola düşüb. 2020-ci ilin oktyabrın 14-ü şəhid olub.
Eşqin anasını itirəndə 12 yaşı olub. 3 qardaşın sonbeşiyi olan Eşqin anasının yoxluğu ilə barışmaqda çətinlik çəkib. Bir az ərkəsöyünlük edirmiş amma ailədə hərkəs onu çox sevib. Evdə özü üçün otaq ayırmaq istəyən Eşqinin atası indi onun istədiyi otağı onun üçün ev muzeyi edib.
Trend-in Qarabağ Bürosunun çəkliş qrupu şəhid Eşqin Mehdilinin evində olub. Ailəsindən bildirilib ki, Eşqinin anasından yadigar qalan ailədə 3 oğulun 2-si hələ də hərbi xidmətdədir. Böyük qardaşları ilə danışanda deyirmiş ki, bu torpaqları niyə almırsınız, mən hərbi xidmətə gedəndə o torpaqları alacam. Eşqini hirsləndirmək üçün isə qardaşları ona "hə bilirik Lələ təpəni sən almısan Eşqin" deyirdilər. Ağbirçək nənəsi Eşqinlə fəxr edir, deyir ki, Eşqin sözünü tutdu. Dedi də, dostları ilə birlikdə o torpaqların alınmasında iştirak etdi də...
Eşqinin qəhrəmanlığı ilə qürur duyan, amma yoxluğuna barışa bilməyən bibisi qızı Dünya, babalarının ən çox sevdiyi nəvəsinin Eşqin olduğunu deyir: Məhz buna görə də babam ona NƏR balam deyirdi.
Eşqinin bu dünyadakı diləklərinin hamısı oktyabr ayında baş tutdu. Kəlbəcərdə başlayan döyüş yolu, Cəbrayıl və daha sonra Füzulidə bitdi. O vətən yolunda bitirdiyi gənc ömrünü əslində ölümsüzləşdirdi. Mükafatların ən alisini - Şəhidlik zirvəsini fəth edən Eşqinin qəhrəmanlığını Ali Baş Komandan da qiymətləndirdi. Eşqin Mehdili Vətən uğrunda gedən döyüşlərdəki xidmətinə və göstərdiyi şücaətə görə 2 medal ilə təltif olunub.
