“Azərbaycan Meliorasiya və Su Təsərrüfatı” ASC-nin Tikilməkdə olan meliorasiya və irriqasiya obyektlərinin birləşmiş müdiriyyəti Mingəçevir şəhərinin ətrafında Kür çayının sağ sahilində formalaşmış sututarların (1) və Baş Mil-Muğan kollektorunun (2) suyundan suvarma məqsədli istifadənin texniki-iqtisadi əsaslandırılması və layihə sənədlərinin hazırlanması ilə bağlı elan etdiyi 2 açıq tenderə yekun vurub.
DİA.AZ dövlət satınalmalarının vahid internet portalına istinadən xəbər verir ki, tenderlərin qalibi "Geo-Su Group" MMC-dir.
Qalib şirkətə müvafiq olaraq 1,2 milyon manat və 800 min manat, ümumilikdə isə 2 milyon manat ödəniləcək.
DİA.AZ bildirir ki, “Geo-Su Group” MMC 2020-ci ildə dövlət qeydiyyatına alınıb, nizamnamə kapitalı 10 manatdır və qanuni təmsilçisi Elvin Rüstəmovdur. Şirkətin vergi borcu 5 355 manatdır.
Xatırladaq ki, vergi borcu olan şirkətlərin tenderdə iştirakı “Dövlət Satınalmaları haqqında” Qanunun 6.2.5-ci maddəsinin tələblərinə görə də mümkün deyil.
DİA.AZ
