“Laçın dəhlizindən Xankəndinin girişinə qədər olan ərazilərə nəzarətimiz tam təmin olunub. Bu məlumatı indi aldım”.
Bu fikirləri hərbi ekspert Ədalət Verdiyev özünün “Facebook” səhifəsində yazıb.
Onun sözlərinə görə, Laçın dəhlizinin bağlanmasına dair ermənilərin narahatlığı da bu nəzarətdən qaynaqlanır və əsassız deyil.
Məsələ ilə bağlı daha ətraflı məlumat almaq üçün Ə.Verdiyevlə əlaqə saxladıq. O, “Sherg.az”a bunları söylədi:
“Laçın dəhlizi artıq Ermənistan ilə rusların nəzarətində olan və Azərbaycan ərazilərini birləşdirən yeganə yoldur. Burada baş verən proseslər hər bir vətəndaşımız üçün çox vacibdir. Ümumiyyətlə, Laçın dəhlizi həssas bir mövzudur. Odur ki, artıq Azərbaycan Ordusu bu dəhliz ətrafında olan mövqelərini kifayət qədər möhkəmləndirib, onların mühəndis təminatını həyata keçirib və Azərbaycan son aylarda bu mövqelərini mümkün olduğu qədər irəli çəkib. Yəni Ermənistan tərəfindən Qarabağa daxil olan yüklərin, maşınların, o cümlədən buranı tərk edən vasitələri izləmək üçün geniş imkanlar əldə edib.
Bu imkanlarımız həm Şuşa şəhərinin Laçın-Turşsu istiqamətində, həm də Şuşa-Xankəndi istiqamətində həyata keçirilib.
Şuşa-Xankəndi yolunun yarısına qədər olan ərazilərə tam şəkildə nəzarət etdiyimizi deyə bilərəm. Nəzarət funksiyalarını həyata keçirmək üçün ordumuzun müşahidə məntəqləri və bu məntəqələrə yerləşdirdiyimiz texniki kəşfiyyatdan istifadə edirik. Bu texniki kəşfiyyat vasitələri arasında elektron optik sistemlər də mövcuddur.
Hazırda Azərbaycan nəinki Şuşa şəhərindən Xankəndini, hətta Xankəndidən sonrakı yaşayış məntəqələri ərazisində birbaşa görüntü sahəsində olan fəaliyyətləri tam şəkildə izləyə bilir”.
