Çox yox, bir neçə ay əvvəl Dövlət Təhlükəsizliyi Xidməti Cəlilabad Rayon İcra Hakimiyyətində əməliyyat keçirdi və icra başçısı Namiq Zeynalov həbs edildi.
O, Cinayət Məcəlləsinin 179.2.2, (mənimsəmə və ya israf etmə təkrar törədildikdə), 179.2.3 (şəxs tərəfindən öz qulluq mövqeyindən istifadə etməklə törədildikdə), 179.2.4 (xeyli miqdarda ziyan vurmaqla törədildikdə), 308.2 (vəzifə səlahiyyətlərindən sui-istifadə), 311.3.3 (külli miqdarda rüşvət alma), 311.3.2 (təkrar rüşvət alma), 313-cü (vəzifə saxtakarlığı) maddələri ilə təqsirləndirilərək, barəsində 4 ay müddətinə həbs qətimkan tədbiri seçildi.
Elə bilirsiniz bu olay, Cəlilabaddakı digər məmurlara ibrət oldu. Əsla. Yenə rüşvət, qanunsuzluq Cəlilabadda tüğyan edir.
Görəsən, Cəlilabad RİH-nin başçısı səlahiyyətlərini icra edən Mansur Məmmədov “gözü çıxan qardaşından” nəticə çıxarmadı ?
Cəlilabad sakinlərinin ''Gündəlik Bakı''-ya verdiyi xəbərə görə, rayonda qanunsuzluqlar baş alıb gedir.
Cəlilabadda günün günorta çağı camaatın evini, torpağını, qanuni mülkiyyətini əlindən alırlar.
Təsəvvür edin ki, kiminsə qapısı 2 gün bağlı olsa, işığı yanmasa, yaxud harasa 3-4 günlüyə qonaq gedibsə, qoçu dəstəsi qapını sındırır, evə başqasını köçürüb, evi zəbt edirlər.
Məsələ bununla bitmir. Bu qoçu dəstəsi pullu şahidlər tapır, notariusa pul verib saxta sənəd düzəltdirir, hətta məhkəmə “tamaşası” da qururlar. Yəni ələ keçirilən torpağı, evi, əmlakı kiminsə adına guya qanuniləşdirirlər.
Bütün bunlar rayonun icra başçısı əvəzi Mansur Məmmədovun gözü qarşısında baş verir. Rayonun rəhbəri olan şəxs ağzına su alıb susur.
Bu işdə ən çox rol oynayanlardan biri də Cəlilabad rayonu 1 saylı Dövlət Notariat Kontorunun xüsusu notariusu Lətif Fərəcovdur.
Əsas rollardan birini, “pulunu ver haqqını al” deyən, Cəlilabad rayon məhkəməsinin sədri Vüsal Cəbrayılov oynayır.
Bu adam başa düşmür ki, o, dövlətin adından qərar verir və vətəndaşları dövlətdən narazı salır.
Yəni vətəndaşın evinin, torpağının zəbt olunması ilə bağlı qərarı məhkəmə sədri Vüsal Cəbrayılov verir.
Digər vacib rolda Cəlilabad RİH başçısının Cəlilabad şəhəri üzrə nümayəndəsi Mirməhəmməd Kazımovdur.
Mirməhəmməd seyid ailəsindən olsa da, oğurluğa, haqsızlığa haqq qazandırır. Yeri gəlmişkən, Mirməhəmməd özü haqqında mətbuatda xeyli bəy tərifi yazdırıb.
Digər vacib rol sahibi Cəlilabad şəhər bələdiyyəsinin sədri İlham Babayevdir.
Başqasını torpağını zəbt edənlərdən biri də Cəlilabadda “Qoşa nağaraçalan” ləqəbli Vidadidir. O, başqasının torpağını zəbt edərək, yerində Mebel salonu tikdirib.
Bir sözlə, Cəlilabadda, nağaraçalan ölkə qanunlarından üstün sayılır.
Görəsən, yuxarıda sadaladığımız qurumların yuxarıdakı böyükləri, baş bilənləri bu barədə nə düşünür ?
Deyəsən, DTX Cəlilabadda yenidən əməliyyat keçirməli olacaq.
