“Dünən təxminən 21:50 radələrində püskürməsi qeydə alınan Daşlı vulkanı Bakı arxipelaqı adlanan neftli-qazlı rayonda yerləşir”.
Bu barədə Azərbaycan Milli Elmlər Akademiyasının Geologiya və Geofizika İnstitutunun "Palçıq vulkanizmi" şöbəsinin aparıcı elmi işçisi Orxan Abbasov bildirib.
O deyib ki, vulkan Bakıdan təxminən 75 km cənub-qərbdə yerləşir: “Azərbaycanın aktiv vulkanlarından hesab olunur. 1920 və 1945-ci illərdə indiki kimi odlu püskürmələri qeydə alınıb. Daşlı vulkanın güclü püskürməsi nəticəsində qeydə alınan alov sütununun hündürlüyü 500 m hündürlükdən də artıq olub. Bu da çox güman kimi sözügedən vulkanın uzun müddət ərzində püskürməməsi və böyük enerji toplaması ilə əlaqədardır”.
O. Abbasov qeyd edib ki, şimalda yerləşən nisbətən böyük ada vulkanlarına, o cümlədən Səngi-Muğan, Xarə-Zirəyə görə Daşlının püskürdüyü palçıq kütləsi kiçik sahədə yayılıb: “Vulkanın dənizdə yerləşməsi və palçığın gec quruması ilə əlaqədar hazırda hadisə yerində hər hansı tədqiqat işinin aparılması qeyri-mümkündür”.
