Konsultativ poliklinika şöbəsində həkim-kardioloq kimi fəaliyyət göstərən,
xəstələrinin ümid yeri olub, əhali arasında kifayət qədər hörmətlə tanınan həkim Əhməd Əhmədov haqqında yazıb dəyərli oxucularımıza tanıtmaq istəyidir məqsədim. Uzun illər bu yolda şərəf və ləyaqətlə addımlayan Əhməd həkim ömrünün gecəsini-gündüzünü insanların sağlamlığı yolunda həsr etmiş bir həkimdir. İşini çox sevir və öhdəsindən layiqincə gəlir Əhməd həkim. Ona üz tutan insanlar həmişə əlləri şəfalı həkimin təyin etdiyi dəqiq diaqnozdan razılıqla ayrılır, ona hər zaman dua edir, can sağlığı arzulayırlar. Çünki Əhməd həkim neçə-neçə insanların həyatına, ömrünə nur, şəfa bəxş etmişdir. Hələ uşaqlıq illərindən həkim olmaq arzusu ilə böyüyən Əhməd Əhmədov
hörmətli bir ailədə dünyaya göz açıb.
Orta məktəbdə oxuduğu illərdə öz bilik və bacarığı, fəallığı ilə seçilən, ailəsinə layiq olmaq, ali təhsil almaq, özünəməxsus yer tutmaq, insanlara, xalqa gərək olmaq kimi ali hisslərlə böyüyən Əhməd Əhmədov tələbəlik illərində çalışqan və elmi biliklərə dərindən yiyələnən tələbə olmaqla yanaşı, eyni zamanda vətənpərvər idi.
Onun fikrincə həkim öz ixtisasını dərindən bilməklə yanaşı, əsl ziyalı olmalıdır. Təsadüfi deyil ki, Hippokrat həkimlikdə ən vacib 3 keyfiyyətdən birinin söz olduğunu göstərmişdir. Həkim gözəl nitq qabiliyyətinə malikdirsə, hələ xəstə ilə ilk ünsiyyətində onda ümid, inam yaratmaqla müalicəyə başlamış olur. Həkimin xoş sözü, mehribanlığı, həssaslığı, qayğıkeşliyi xəstənin vəziyyətinə müsbət təsir göstərir.
Ailəsindən, sevdiklərindən ayrı düşən hər bir xəstə daha həssas, daha kövrək olur və adi bir səsə, hərəkətə reaksiya verir.
Belə olduğu halda əsil ziyalı həkimin göstərdiyi qayğısı, səmimiyyəti ən gözəl,təsirli müalicə vasitəsidir.
Müqəddəs peşəsi, bilik və bacarığı və təyin etdiyi dəqiq diaqnozları ilə neçə-neçə posientlərinin həyat eşqini, yaşamaq ümidini özünə qaytaran, sevdiklərinin qəlbində bir ümid çırağı yandıran Əhməd həkim ona pənah gətirən xəstələrinin hər zaman sevimlisi, ümid yeridir. Əhməd həkim öz işini mükəmməl bilən, peşəsinə sadiq olan əsil həkimlərdən biridir.
Sözsüz ki, peşəsindən asılı olmayaraq, əsas məqsəd işini sevərək yerinə yetirmək və gördüyün işlə insanlara, cəmiyyətə faydalı, gərəkli olmaqdır.
Əhməd Əhmədovun timsalında sənətini dərindən bilən, həkim adını öz əməlləri ilə layiqincə doğrultmağı bacaran, işini vicdanla yerinə yetirən bütün həkimlərimiz cəmiyyətimizin ən gərəkli, ən çox ehtiyac duyulan və sevgiyə, hörmətə layiq şəxsləridir. Biz inanırıq ki, bütün bu kimi insanı keyfiyyətləri özündə formalaşdıran Əhməd həkim şəfalı əllərilə neçə-neçə ailələrin üzünü güldürüb, insanları öz əvvəlki sağlamlıqlarına qovuşdurmaqdan yorulmayacaq.
Dəyərli Əhməd həkim!
Sizin elmi biliklərinizin, təcrübənizin bar-bəhəri təyin etdiyiniz dəqiq diaqnozlardır. Fəaliyyətiniz boyunca çəkdiyiniz zəhmət və yaratdığınız gözəlliklər nur olub yolunuza işıq salsın.
Sizə çətin və şərəfli peşənizdə uğurlar arzulayır, ailənizlə, əzizlərinizlə bərabər sizə sağlam, uzun ömür və xoşbəxt həyat sürməyi arzulayır, sizə pənah gətirən xəstələrinizin hər zaman ümid yeri, pənahı olasınız.
Şəfalı əlləriniz var olsun, Əhməd həkim.
