“Azərenerji” Açıq Səhmdar Cəmiyyəti Qaz mühərrikləri üçün energetik yağların satın alınması (elektrik stansiyaların mühərriklərində mövcud olan energetik yağlara istehsalçının tələbinə və avadanlıqların istismar qaydalarına uyğun olaraq eyni markalı yağların əlavə edilməsi və ya yenilərinin tədarük olunması) üzrə keçirdiyi başqa bir tenderdə “CASPIAN LUBRICANTS AND CHEMICALS COMPANY” QSC ilə 6.459.910 manat məbləğində satınalma müqaviləsi bağlayıb. Məlumat dövlət satınalmalarının vahid internet portalına 11.10.2024-cü il tarixdə yerləşdirilib.
Qeyd edək ki, 12.08.2024-cü ildə başlanılmış 91704 nömrəli tender müsabiqəsi 04.10.2024-cü il tarixdə yekunlaşıb.
Qeyd edək ki, bu müsabiqə üzrə müqavilə bağlanılmamışdan bir həftə əvvəl, 04.10.2024-cü ildə “Azərenerji” ASC tərəfindən dövlət satınalmalarının vahid internet portalına yerləşdirilmiş məlumatda “Azərenerji” ASC tərəfindən 13.09.2024-cü il tarixində Qaz mühərrikləri üçün energetik yağların satın alınması (elektrik stansiyaların mühərriklərində mövcud olan energetik yağlara istehsalçının tələbinə və avadanlıqların istismar qaydalarına uyğun olaraq eyni markalı yağların əlavə edilməsi və ya yenilərinin tədarük olunması) üzrə keçirilmiş tenderdə (müsabiqə 91704), Azərbaycan Respublikasının Nazirlər Kabinetinin 30.12.2023-cü il tarixli, 494 saylı Qərarına əsasən, “LUBRİSTAR LLC” MMC “Müvafiq sahədə təcrübə tələbi (oxşar işlər) üzrə təqdim olunan müqavilələrin icrasının 80 faizdən çoxunun tamamlanmış olması (təhvil-təslim və ya yekun təhvil-təslim aktları)”, maliyyə imkanları üzrə “EOQ-in 30% həcmində maddi vəsaitə çıxışının olması və bank dövriyyəsi barədə bank tərəfindən verilmiş arayış” tələbləri ödənilmədiyi üçün, həmçinin sənədlər üzrə tələb olunan natamamlıqlar “Dövlət satınalmaları haqqında” Qanunun 23.11. maddəsinə əsasən 3 iş günü ərzində aradan qaldırılmadığı üçün təchizatçı Qanunun 35.1.1. və 35.1.3. maddələrinə uyğun olaraq satınalmadan kənarlaşdırıldığı bildirilir.
Apardığımız ətraflı araşdırmalarda məlum oldu ki, “Azərenerji” ASC 04.10.2024-cü ildə 91704 nömrəli tender müsabiqəsindən kənarlaşdırdığı “LUBRİSTAR LLC” MMC ilə iki ay əvvəl işbirliyində olub. Belə ki, “Azərenerji” Açıq Səhmdar Cəmiyyəti Qaz mühərrikləri üçün energetik yağların satın alınması (elektrik stansiyaların mühərriklərində mövcud olan energetik yağlara istehsalçının tələbinə və avadanlıqların istismar qaydalarına uyğun olaraq eyni markalı yağların əlavə edilməsi və ya yenilərinin tədarük olunması) üzrə keçirdiyi tenderdə “LUBRİSTAR LLC” MMC ilə 4.555.934,69 manat məbləğində satınalma müqaviləsi bağlayıb. Məlumat dövlət satınalmalarının vahid internet portalına 29.07.2024-cü il tarixdə yerləşdirilib. Qeyd edək ki, 10.05.2024-cü ildə başlanılmış 84073 nömrəli bu açıq tender müsabiqəsi 18.07.2024-cü il tarixdə yekunlaşıb.
Buradan suallar yaranır. Necə olur ki, “Azərenerji” ASC -nin rəsmiləri 2-3 ay əvvəl 4 milyon manat dəyərində müqavilə bağladığı “LUBRİSTAR LLC” MMC-nin uyğunluq göstəricilərində olan nöqsanları 3 ay sonra görə biliblər? Buradan görsənən odur ki, “Aərenerji” ASC -nin Satınalma Komissiyası təchizatçıların uyğunluğunun əvvəlcədən müəyyənləşdirilməsi prosedurunun keçirildiyi zaman bu çatışmazlıqlara sadəcə göz yumub.
MMC-yə gəlincə.
Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “LUBRİSTAR LLC” (VÖEN: 1302458571) Məhdud Məsuliyyətli Cəmiyyətinin 20.04.2011-ci il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 50 manat olan MMC-nin hüquqi ünvanının , BAKI ŞƏHƏRİ YASAMAL RAYONU, ŞƏRİFZADƏ, ev 213 B, qanuni təmsilçisi kimi isə Şamilov Nəsib Paşa oğlu qeyd olunub.
Şirkətin rəsmi veb saytında qeyd edilmiş məlumatlara görə “Lubristar LLC” MMC şirkəti 2011-ci ildə Nordex Group bazasında yaradılmışdır. 2008-ci ildən Nordex Group Almaniyanın “Rheinol” motor yağlarının rəsmi distribyutorudur. 2014-cü ildə Lubristar LLC MMC “Shell Lubricants” şirkətinin Azərbaycanda makrodistribyutoru statusuna layıq görüldü və bu günə kimi “Shell” mühərrik yağlarının ölkəmizdə rəsmi təmsilçisidir. Şirkətimizin idxal etdiyi bütün “Shell” sürtgü məhsulları birbaşa “Shell Lubricants”-dan alınır, buna görə də biz məhsulların orijinallığına və keyfiyyətinə zəmanət veririk.
Maraqlıdır, “Azərenerji” ASC məhsullarının orijinallığına və keyfiyyətinə zəmanət verən “Lubristar LLC” MMC ilə 4 milyon manatdan çox dəyəri olan satınalma müqaviləsi bağladıqdan sonra eyni lot üzrə keçirdiyi tenderdən niyə kənarlaşdırıb?
Qeyd edək ki, son vaxtlar elektron mediada yayılan məlumatlara görə “Azərenerji” ASC nin satınalma müqaviləsi bağladığı şirkətlərin əksəriyyətinin Cəmiyyətin sədri Baba Rzayevə bağlı olduğu bildirilir. Elə noyabrın 11-də 6 milyonluq müqavilə bağladığı “CASPIAN LUBRICANTS AND CHEMICALS COMPANY” QSC-nin də Baba Rzayevlə bağlı olması barədə məlumatlar var. Görünür Baba Rzayev ya həmişə olduğu kimi ikili standartlar yolunu seçib, ya da “Lubristar LLC” ilə şəxsi maraqları toqquşub.
Aktualinfo.org
