Koronavirusdan sağalmış şəxs ona ikinci dəfə yoluxa bilər.
ictimailider.az xəbər verir ki, bunu Trend-ə açıqlamasında Azərbaycanın baş infeksionisti Cəlal İsayev deyib. Onun sözlərinə görə, hələlik Azərbaycanda belə bir şey baş verməyib:
"Ümumiyyətlə yoluxucu xəstəliklərin hamısında ikinci dəfə yoluxma mümkündür. İnsan əgər xəstəliyə yoluxdusa, onda bu xəstəliyə qarşı immunitet yaranır. Elə yoluxucu xəstəliklər var ki, sağaldıqdan sonra ona qarşı yaranan immunitet davamlı olur, ancaq buna baxmayaraq belə infeksiyalara qalib gəlmiş şəxslərin təkrar eyni xəstəliyə yoluxması mümkündür. Lakin təkrar yoluxma halında xəstəlik yüngül keçir, güclü bir ağırlaşma müşahidə olunmur.
Bəzi infeksion xəstəliklərdə isə immunitet qısa müddətli, məsələn, 6 ay olur. Biz hələlik koronavirus barədə bir çox şeyi bilmirik. Yaranan immunitetin qüvvəsi nə qədərdir, neçə müddət bizi qoruya biləcək? Təbii ki, hətta davamlı immunitet yaransa belə, bütün infeksiyalarda olduğu kimi koronavirusa təkrar yoluxma mümkündür. Ancaq hələlik Azərbaycanda belə bir şey baş verməyib”.
C.İsayev məktəblərin açılması ilə bağlı səsləndirilən təkliflərdən də danışıb. Onun sözlərinə görə, yeni tədris ilinin başlanılması ilə bağlı verilən tövsiyə və göstərişlərə əməl olunmalıdır.
